Roland-Meyer.lu

An der Literaturbäilag vum Tageblatt war dëser Deeg eng Rezensioun vu “Roughmix”. Dat freet mech, ech hunn et ëmmer gär, wann iwwer d’Buch geschwat gëtt. - Zu Lëtzebuerg gëtt vill ze wéineg iwwer Bicher geschwat! - De Jeff Thoss huet dat tipptopp gemaach, eng Parti Detailer ervirgehuewen, déi weisen, datt hien den Text net nëmmen iwwerflächlech gelies huet, mee sech richteg drop agelooss huet. An hie beschreift och ganz gutt déi Gefiller, déi ee beim Liesen huet.
A sengem leschte Saz seet en: “Roughmix ist ein hochaktueller, vielleicht gar ein wichtiger Roman, aber oft auch ein ärgerlicher, dem ein finaler Feinschliff wohl nicht geschadet hätte.”

Ech hu mer gesot, wann ee säi Buch “Roughmix” nënnt, an och stilistesch esou drun  erugeet, da muss een och de Courage hunn, fir grad op esou ee “Feintuning” ze verzichten. Nëmmen da bleift een authentesch a kongruent. Datt dat “ärgerlich” ass, ass gewosst an esou och geplangt… an datt ech d’Leit verstéieren an opbréngen, domat muss ech liewen.

Ech wëll de Lieser mat dësem Buch rose maachen, an ech wëll, datt en dat och kierperlech spiert. A mäi Wee fir dat ze realiséieren war de “Roughmix” als solchen stoen ze loossen.

Hei d’Kritik am Tageblatt

Hei weider Informatiounen iwwer “Roughmix”, ee Buch bei diem sech engem emol kann de Mo ëmdréinen

Et geet also nees an d’Rennen! Esouvill literaresch Bicher wéi nach ni sinn op der Longlist a Roughmix ass dobei!

Hei gëtt Informatiounen iwwer Roughmix

An hei iwwer d’Longlist a wien nach alles dobei ass

“Roughmix”… déi perfekt Lektür fir am Summer op d’Reess ze goen!
Hei e klengen Auszug aus der Liesung de 4.6. zu Miersch am Kulturhaus:
http://www.luxorr.lu/lord-tv.html
“Fust Friends” sinn: Luc Hoffmann, Mulles Scholtes a Jang Steffen.
Am Hierscht gëtt et nach weider Liesungen, ënnert anerem zu Uewerkur an an der Staadt…

Et ware ganz vill Leit gëschter op der Presentatioun vu “Roughmix”, domat hat kee wierklech gerechent. De Mix aus Liesen a Musik huet geklappt, war vläicht e besse laang, mee fir déi “éischte Kéier” hëllt een sech ëmmer zevill vir. D’Kritike ware super, mee mir brauche jo och net vill . Mir schaffe weider um Mix fir den Hierscht, wa mer mat der Show op Tournée ginn.

E ganz décke MERCI dem Lieshaus, dem Kulturhaus, dem Verlag Op der Lay an domat mengen ech all déi Leit, déi sech gëschter beméit hunn.

D’Fläschepost ass elo also ënnerwee, wien se alles opmécht a wat draus gëtt, wees ech net.

Hei d’Kritik aus dem Feierkrop

An hei e ganze Koup weider Infoen iwwer d’Buch

An Zesummenaarbecht mat Op der Lay an dem Mierscher Lieshaus ass den Owend um 20.00 Auer zu Miersch am Foyer vum Kulturhaus déi offiziell Presentatioun vu “Roughmix”.

D’Lëtzebuerger Sportswelt huet sech géint mech zesummegedoen an esou hunn ech den Owend als Konkurenz de Lännermätsch géint Italien an de Prolog vum Tour de Luxembourg.
Mee mir wëssen ze kämpfen: ënnerstëtzt ginn ech vun “Just Friends”, dem Mulles Scholtes, dem Luc Hoffmann an dem Jang Steffen. Den Entrée ass fräi a Reservatioune gëtt et keng; well déi wierklech gutt Saachen am Liewe kann een net am Viraus reservéieren.

Bis den Owend, ech freeë mech an ziddere mech duerch den Dag!

De Gilles Wünsch vum Radio 100,7 presentéiert haut um 17.20 Auer a mar um 8.35 Auer mäin neit Buch “Roughmix” a virun allem d’Liesung e Mëttwoch um 20.00 Auer am Mierscher Kulturhaus an Zesemmenaarbecht mat Op der Lay an dem Mierscher Lieshaus.

Hei kënnt Dir lauschteren

an hei weider Informatiounen iwwer d’Buch

An Zesummenaarbecht mat dem Mierscher Lieshaus an dem Verlag Op der Lay stellen ech

e Mëttwoch, de 4. Juni 2014 um 20.00 Auer

zu Miersch am Foyer vum Kulturhaus

mäin neit Buch vir.

Musikalesch ënnerstëtzt ginn ech vun “Just Friends”, dat sinn: de Mulles Scholtes op der Gitar, de Luc Hoffmann um Gesang an op der Gitar an de Jang Steffen um Bass an op der Percussioun.

Den Entrée ass fräi!

An hei gëtt et Infoen iwwer d’Buch

“Lëtzebuerg ass net de Mëttelpunkt vum Universum. Wann s de hei liefs, mengs de, et géif just Lëtzebuerg, et géif just déi Lëtzebuerger Façon de vivre, de luxembourgisch lifestyle, et misst esou sinn, mengs, d’Liewe wir esou, mee wann s de bis op aner Plazen an der Welt kënns, gesäis de ganz séier, op wat fir enger Insel datt s du liefs. Wann s de hei liefs, da liefs de d’Exceptioun, da bass de an enger priveligéierter Situatioun. D’Liewen u sech ass net dat, wat mir zu Lëtzebuerg zanter eiser Kandheet als d’Liewe kenne geléiert hunn, Sécherheet, Gesondheet, Wuelstand, dat ass d’Ausnaam. De Bléck vu bausse schäerft d’Bild, dat s de der méchs.”

Esou fänkt Roughmix un. Mäin neit Buch spillt an der Provence, zu Venedeg, an Apulien, am Maroc, an Thailand an op Bali an et geet trotzdeem just em Lëtzebuerg! Ëmmer nees wonnere mir eis, firwat Lëtzebuerg am Ausland esou ee schlechten Image huet, maachen elo esouguer nation branding fir diem schlechte Ruff lasszeginn. Mee näischt kënnt vu näischt.

An engem Land, an diem joerelaang alles wat gestéiert huet, ënnert den Teppëch gekiert gouf, muss een net iwwerrascht sinn, wann dien Dreck op eemol op anere Plazen opdaucht, sech nei Weeër a Kanäl sicht.

De Pierre, dien et bis zum Minister bruecht huet, an den Antoine, en onopfällege Landschoulmeeschter, hunn an de fréien 80er zesummen an enger Rockgrupp gespillt a sech dono aus den Ae verluer. Elo begéinen si sech erëm a staunen net schlecht, wat aus hieren Ziler, Dreem, Wënsch, Frëndinnen a Frënn, also aus hierem Liewe ginn ass. Esou haten si sech dat net virgestallt.

Op 312 Säiten probéieren ech d’Bild vun enger Generatioun a vun engem Land “zesummenzemixen”. Et ass ee “raue, graffe” Mix ginn, dien näischt verheemlecht an näischt ënnert den Teppëch kiert. “Wa Muedebëtzeg de Blues war, dann ass Roughmix de pure Punk!”

Vu mar u (28.4.) kritt dir dat neit Buch iwwerall! Wa “Muedebëtzeg” Blues war, dann ass “Roughmix” Punk: “an dat an engem Land wou villes ënner den Teppëch gekiert gëtt, wou iwwer e ganze Koup Theme guer net geschwat gëtt, wou de Bléck vu baussen d’Siicht schäerfe muss… Wat hu mir ze verstoppen?”
Hei déi éischt Infoen vun Op der Lay

Dat ass eppes wat mech immens freet: “Muedebëtzeg” gëtt nach ëmmer vill gelies an och vill kaaft! Esou ass et scho bal normal, datt elo bei “Op der Lay” déi drëtt Oplo virbereet gëtt. Wann Dir d’Buch nach net hutt, dann ass also elo de Moment, fir et ze kafen .

Hei kritt Dir Informatiounen iwwert d’Buch.

Hei kënnt Dir d’Buch bei “Op der Lay” kafen.

“Muedebëtzeg” ass och dat éischt Buch op Lëtzebuergesch gewiescht, dat et fir de Kindle ginn ass.

An hei gëtt et d’”Muedebëtzeg” bei iTunes.