Wann dir “Drôle de guerre”, de Programm 2014 vum Kabaret Sténkdéier wëllt kucke kommen, da geet dat elo nach zu Miersch am Kulturhaus an zu Biergem “beim Nëssert”.
De Cube 521 zu Maarnech ass ausverhaaft.
Egal ob Dir wëllt op Miersch, Maarnech oder Biergem kucke goen, … de Verkaf ass elo iwwerall op:
MIERSCH: Kulturhaus
BIERGEM: Beim Nëssert
MAARNECH: Cube 521
Billette gëtt et schonns fir de Cube 521 zu Maarnech an och elo fir de Nëssert zu Biergem. Elo heescht et sech bäi maachen…
Hei all d’Infoen iwwer die neie Programm “Drôle de guerre”
De Claude “Sibi” Sibenaler an de Claude Weber hunn elo de ganze Programm vum leschte Joer op Youtube gesat an Dir kënnt en nach eng Kéier kucken. Hinnen zwee en décke Merci an Iech vill Spaass…
Elo heescht et sech also bäimaachen: et gëtt schonns Kaarten zu Maarnech am Cube 521!
Dann haut emol déi schlecht Noriichten:
1. Eisen Tom Kraemer huet aus gesondheetleche Grënn decidéiert, de Kabaret Sténkdéier ze verloossen. Déi nächst Saison ass hien also leider net méi mat dobäi, weder beim Schreiwen, nach op der Bühn. Den Alain “Scheedchen” Adams an ech schreiwen de Programm 2014 a mir spillen en zu véier op der Bühn: d’Géraldine Posing, d’Conny Braquet, de Raymond Bertemes an den Nico Dabé.
2. Mir kënnen net méi am Keller vum CNL/Maison Servais optrieden, wëll si déi Plaz selwer brauchen. De Keller ass also definitiv “passé”. Mir sinn nach am Kucken, wéi a wou genee mir den Hierscht spille wäerten, mee do kënnt an nächster Zäit méi no.
De Claude Sibi Sibenaler huet déi 13 éischt Stécker aus eisem 2013er Programm “Héichwaasser” elo online gesat. De Rescht kënnt nach no. Him en décke MERCI an hei kënnt Dir se kucken:
Zanter 2006 ass et fir mech scho bal eng Traditioun ginn: ech schreiwen een oder zwee Texter fir d’Revue. An och dëst Joer ass nees dien een oder aneren Text vu mir an der Revue 2014 ze gesinn. Den Titel fannen ech dëst Joer nawell extragutt geroden. Première ass den 8.4.2014.
Hei gitt Dir méi gewuer.
En Dënschdeg zu Walfer ware nees vill Leit do, schätzungsweis eng 80 Stéck, vläicht esouguer méi. Dat war déi leschte Kéier, datt ech dës Liesung gemaach hunn. An och hei gouf ech nees gefrot, ob et den Text vum “Zickelalarm” net als Buch ze kafe gëtt. Gëtt et net!
Wéi ech mat dëser Liesung ugefaangen hunn, hätt ech mir ni dreeme gelooss, datt dat esou ee groussen Erfolleg géif. Ech hat also och net eng Sekonn doriwwer nogeduecht de Manuskript ze publizéieren.
Mee nodeem esou eng grouss Nofro besteet, hunn ech mir virgeholl, éischtens an engem bis zwee Joer en neien “Zickelalarm” ze maachen an dann zweetens dien éischten an dien zweeten zesummen erauszeginn. Do brauche mir iewer nach e bësse Gedold.
Am “Zickelalarm I” waren Extraiten aus folgende Bicher: “Den décken dommen Dudu” an “Dem Kinnek säi Gaart”… fir all déi, déi wëlle noliesen. 
An op Youtube sinn elo grouss Deeler vum “Zickelalarm I” ze gesinn:
“Hallo, Rol!
Am Cité, dat war nawell ganz flott, nee, saugudd!! Wat hues du eng Energie! Och deng “politesch” Aussoen (Kids, onméiglech Immobilienpreisser, den Zwang zu 2 schaffen mussen ze goen, den Réunitis-, Charta- an Formatiouns-Wahn, …) waren kloer, engagéiert, pertinent, couragéiert - Respekt!
Du soss, du giffs all Kand reich Elteren verschafen. Dat, méngen ech, ass effektiv dat eenzegt Mettel, fir all di Gewalt, all di aktuell himmelschreiend Ongerechtegkeeten an den Greff ze kréien.
Dozou just nach e Sproch, anscheinend vum Charlie Chaplin: WER NICHT GELIEBT WIRD, HASST! All di Leit, di komplett lenks leien gelooss gin, um oder ennert dem Existenzminimum mussen liewen, all di Kanner - di mussen jo iwwerzeegt sin, si giffen net “geliebt” gin. Wat kënnt do nach op eis duer???
Merci, Rol - dat war saugudd! Pir
P.S.: Vleit, vleit, kommen ech och nach op Walfer - no guarantee! “
