Ech war schonns e bëssen erféiert, wéi ech gelies hunn, wat se zu Miersch alles iwwer mech zesummegesicht hunn. Mee net nëmmen iwwer mech, nee och nach iwwer “eng Millioun” aner Lëtzebuerger Auteuren. Respekt! Do ass gutt geschafft ginn an et ass wierklech interessant, eng Kéier am Lexikon vun de Lëtzebuerger Auteuren vum Mierscher Literaturzenter (Maison Servais) laanschtzekucken.
E Mëttwoch den Owend um 18.30 Auer stelle mir am Theatersall vun der Uni.lu d`Theaterkofferen vun der Theaterschoul vir. Se sinn allen dräi fir den 3. a 4. Zikel vum Enseignement fontamental: “Dem Kinnek säi Bësch”, “Mam Kapp duerch d`Mauer” an “Dien éiwege Sträit zwëschen diene vu Rappdéckel an diene vu Fatzbeidel”. Déi dräi Stécker hunn ech geschriwwen a mir hunn se elo fir d’Theraterkofferen adaptéiert.
D’Naturverwaltung huet zesumme mat der Theaterschoul am Kader vum internationale Joer vum Bësch d’Theaterstéck “Dem Kinnek säi Bësch” lancéiert, dat ech geschriwwen hunn. Déi leschte Kéier kënnt Dir et elo dëse Weekend zu Käerch gesinn. Dono geet et als Theaterkoffer op d’Reess duerch d’Lëtzebuerger Grondschoulen.
Zu Bascharage, Harel, Wëlwerwolz an an der Ste-Sophie hunn d’Klassen et schonns gespillt. Déi nächst Woch ass de Rendez-vous zu Buerglënster an am Oktober nach zu Käerch. Zesumme mat der Naturverwaltung a virun allem dem Fierschter Serge Hermes huet d’Theaterschoul dëse Projet op d’Bee gestallt an et ass elo immens flott, all déi verschidden Produktioune vun diem selwechte Stéck ze gesinn. Wat hunn déi verschidde Klassen anescht gemaach, wat ënnerscheed hier Optrëtter, mee och, wat ass iwwerall d’selwecht, wou an op wat ass Wäert geluecht ginn? Fir mech als Auteur ass et natierlech ganz interessant ze gesinn, wéi de Public reagéiert a wéi d’Stéck ukënnt.
D’Theaterschoul stellt de Lëtzebuerger Grondschoulen dëst Stéck fir dat nächst Joer als Theaterwalliss zur Verfügung, esou datt eng gewëss Hohaltegkeet fir de Projet erreecht gëtt, wat dem Thema ganz entsprécht. An der Theaterwalliss sinn d’Kostümer, d’Kulissen an de Script; fäerdeg fir d’Prouwen a fir d’Opféierung.
Mir haten eng koppeg Preparatioun: d’Opféierunge waren eigentlech ee Mount ze fréi a virun den Opféierungen war d’Ouschtervakanz, déi de Rhythmus gebrach huet. Zum Schluss sinn d’Kanner iewer iwwer sech erausgewuess a mir haten e Superresultat.
Insgesamt waren et 9 Virstellungen am Cube 521 zu Maarnech: 7 ausverkaaften Opféierungen fir Schoulklassen mat all Kéier 250 Visiteuren, eng Virstellung fir al Leit an dann de Freidegowend, d’Galavirstellung mat wäit iwwer 250 Spectateuren. Domadder hunn also wäit iwwer 2300 Leit de “Kinnek ouni Kroun” gesinn.
Eng ganz Broschür iwwer de Kannertheater an de Lëtzebuerger Grondschoulen hunn ech an diene leschten zwee bis dräi Joer geschriwwen an déi ass elo als N° spéciale beim Ministère de l’Éducation nationale erauskomm. Wann Dir se net automatesch kritt hutt, iewer drunn interesséiert sidd, kënnt Dir Iech bei mir mellen, ech schécken Iech se gären.
Et gëtt enk, wat d’fräi Plaze fir dem Holzwuerm säi neie Musical “Kinnek ouni Kroun” am Cube 521 zu Maarnech betrëfft. Fir Schoulen ass nach mëttwochs mëttes Plaz a fir déi Grouss freides owes. Mee et muss een sech bäimaachen…
De Lëtzebuerger Theater huet den 11. Abrëll Première mat der Revue 2011 wou och nees dien een oder aneren Text vu mir wäert dobäi sinn. Gespillt gëtt zu Lëtzebuerg, Esch an Ettelbréck.
Den Theater.lu spillt am Moment zu Esch, Lëtzebuerg, Iechternach an Ettelbréck dëst lëschtegt Stéck. Flott ass et fir mech wëll do meng zwou “Theaterschoulsjofferen” Carole Flesch a Vanessa Brück matspillen.
Die neie Musical vum Holzwuerm gëtt den 2., 3., 4., 5. a 6. Mee zu Maarnech am Cube 521 gespillt.
De Michel vun Donnerbuerg kënnt eigentlech e gléckleche Kinnek sinn: Hien huet e schéint grousst Räich vun sengem Papp, diem berühmte Waldemar vun Donnerbuerg geierft, hien huet trei Ennerdoen an Dinger an eng gutt Mamm.
Wann et do net déi véier hannerhälteg an duerchdriwwe Ritter ging ginn, déi et op seng Kroun, säi Schatz a säi ganzt Räich ofgesinn hunn. Si knäppen dem Michel eppes no diem aneren of, bis hien um Enn, esou wéi den “Hans im Glück”, just nach mat diem do steet, wat hien um Leif dréit. An dat ass net vill!
Mee de Michel ka kämpfen, hien huet Courage, och wann hien nach net richteg wees, wat dat eigentlech ass. An esou, mat der Hëllef vum Alicia, der Prinzessin vu Blëtzhausen, geléngt et him, dien terribelen, schrecklechen on onheemlech béisen Draach Bazekapp opzedreiwen.
Soll hien dien dann elo Meeschter ginn, mat sengem Säwel Excalibur?
