Gemëschte Gefiller… nach zwee “Kouhändel”
All Joer fänken den Alain Adams an ech de 6. Januar, also op 3-Kinneks-Dag, un, um neie Programm ze schaffen. De Schreifprozess zitt sech méi oder wéineger intensiv iwwer d’ganz Fréijoer bis ufangs August. Da kréien d’Acteuren an d’Actricen d’Texter, an eng éischt Liesprouf kënnt gläich drop. Bis zum Oktober gëtt nach um Programm gebastelt, d’Stécker komplettéiert an da fänken d’Prouwen zu Pëtten un. Dat ass dann déi intensiv Phase mat ca 4 Prouwen d’Woch, net vill Schlof a ganz vill Opreegung an Onrou.
D’Publicitéitsaarbecht kënnt dobei an och d’Ofstëmmung mat de Kulturheiser. Mëtt November ass dann d’Première a vun elo u bläift keng Zäit méi fir näischt… just nach funktionnéieren muss de, d’Opreegung kontrolléieren an de Ball flaach halen.
Dat hu mir elo alles hannert eis, an et bleiwe just nach zwou Virstellungen. Haut a mar zu Biergem am Nëssert. Solls de dech do freeën? Soll een zefridde sinn, nom Motto, alles gutt gelaf, endlech eriwwer? Engersäits schonn, mee et stécht och e gutt Stéck vun engem selwer an esou enger Produktioun, e ganzt Joer Aarbecht mat Enttäuschungen a mat Freed a virun allem mat vill Kontakter a Kooperatioun. Gemëschte Gefiller elo zum Schluss…